ممبئی ٹریفک پولیس ٹریفک قوانین کی خلاف ورزی کرنے والوں کے خلاف سر گرم ہو گئی ہے۔ ایک دن میں چھ ہزار افراد کے چالان کاٹے گئے۔ ٹریفک پولیس نے دہی ہانڈی کے دن خصوصی مہم چلا کر قواعد کی خلاف ورزی کرنے والے ڈرائیوروں کے خلاف یہ کارروائی کی ہے۔
ممبئی ٹریفک پولیس سے موصول ہونے والی معلومات کے مطابق جن لوگوں کے خلاف کارروائی کی گئی ہے ان میں 4800 سے زائد ایسے افراد شامل ہیں جو بغیر ہیلمٹ کے گاڑی چلا رہے تھے۔ مخالف سمت سے گاڑی چلانے والے 580 ڈرائیوروں اور ٹرپل سیٹ والی گاڑیاں چلانے والے 531 ڈرائیوروں کے خلاف کارروائی کی گئی ہے۔ اس کے علاوہ پرمیشن سے زیادہ مسافروں کو لے جانے والے 223 ڈرائیوروں کو سزا دی گئی ہے۔
جمعہ کو دہی ہانڈی کے پیش نظر محکمہ ٹریفک چوکس ہوگیا تھا۔ احتیاطی اقدام کے طور پر، پولیس اہلکاروں کو میٹروپولیس کے چوک چوراہے پر تعینات کیا گیا تھا۔ پولیس کے مطابق دادر میں ہیلمٹ نہ پہننے والے بیشتر افراد کے خلاف کارروائی کی گئی۔ ممبئی کے مضافاتی علاقے میں 1631 ڈرائیوروں کے چالان کاٹے گئے۔
