ممبئی ناسک ہائی وے پر ایچ پی گیس سے بھرے ٹینکر میں لگی آگ، ایک گھنٹے کی مشقت کے بعد آگ پر قابو پایا گیا

بھیونڈی۔(سید نقی حسن) بھیونڈی-تھانے بائی پاس کے قریب واقع سونالے گاؤں کی حدود میں ناسک سے ممبئی کی طرف گیس سے بھرے ٹینکر کے ٹائر میں اچانک آگ لگ گئی۔ اس حادثے کے بعد ڈرائیور نے ٹینکر کو ایک سنسان سڑک کے کنارے کھڑا کر دیا اور آگ بجھانے کی کوشش کر رہا تھا۔
واقعہ کی اطلاع ملتے ہی راجنولی ناکہ پر واقع ٹریفک ڈپارٹمنٹ کے اسسٹنٹ پولیس انسپکٹر وکاس بھنگر دیو پولیس ٹیم کے ساتھ موقع پر پہنچے اور ممبئی ناسک ہائی وے کے دونوں اطراف کی ٹریفک کو بند کرایا اور فائر ڈیپارٹمنٹ کو اطلاع دی۔ بھیونڈی کے.. فائر بریگیڈ کی گاڑیوں نے موقع پر پہنچ کر آگ پر قابو پالیا۔ اس دوران سڑک پر ٹریفک ایک گھنٹے تک درہم برہم رہی۔ آگ پر مکمل طور پر قابو پانے کے بعد ٹریفک پولیس نے دونوں سڑکوں پر بتدریج ٹریفک شروع کر دی۔